觀音菩薩是佛祖

臺北的艋舺龍山寺，是泉州三邑人佇清朝乾隆年間起的廟寺，伊的祖廟是泉州晉江安海龍山寺。龍山寺主要的信仰，是觀音佛祖，也就是觀世音菩薩，觀世音菩薩嘛稱做「觀音菩薩」、「光世音菩薩」、「觀自在菩薩」等等。親像《心經》的第一句經文：「觀自在菩薩，行深般若波羅蜜多時，照見五蘊皆空，度一切苦厄。」彼个「觀自在菩薩」，就是觀世音菩薩。

佇民間有流傳一種講法，講會共「觀世音菩薩」簡稱做「觀音菩薩」，是因為欲避開唐朝皇帝李世民的諱名的緣故。毋過事實敢有影是按呢咧？論真的，這不過是一个傳說，毋是有影的。

咱來看《法華經．普門品》的這段經文：「諍訟經官處，怖畏軍陣中，念彼觀音力，眾怨悉退散。妙音觀世音，梵音海潮音，勝彼世間音，是故須常念。」經文內底同時出現「觀音」佮「觀世音」兩種名號，若準是為著避諱，是按怎無全攏改改去咧？就算偈誦的逐句字數是固定的無遐好改，總著會當重新翻譯，袂到這久閣保留「觀世音」的名稱。閣來看唐朝澄觀大師的《貞元新譯華嚴經疏．卷第七》：「然觀自在，或云觀世音。梵云婆盧枳底，此云觀世。護公悞作毗盧，譯為光也。濕伐羅，此云自在。若云攝伐多，此云音也。梵本有二故，令譯者二名不同。」竺法護譯師有失覺察無會當另外討論，毋過對遮來看就誠明顯，「觀世音」佮「觀音」這兩種譯名佇誠早以前就攏有囉，而且佇唐朝時期就是按呢矣，「觀音」的名稱佮避諱並無關係。

若按呢，是按怎伊會號做「觀世音」菩薩咧？佇《法華經．普門品》內底就有解說囉──「善男子，若有無量百千萬億眾生受諸苦惱，聞是觀世音菩薩，一心稱名。觀世音菩薩，即時觀其音聲，皆得解脫。」至於「菩薩」，實際上就是「菩提薩埵」的簡稱，這是對梵文音譯來的，「菩提」是覺悟的意思，「薩埵」是「有情」，嘛就是眾生。所以菩薩，意譯就是覺有情，總是猶閣毋是佛。若按呢，共「觀音」稱做「佛祖」敢有問題？《千光眼觀自在菩薩祕密法經》：「我念往昔時，觀自在菩薩於我前成佛，號曰正法明，十號具足。」另外《大悲心陀羅尼經》：「佛言：此菩薩名觀世音自在，亦名撚索，亦名千光眼。善男子！此觀世音菩薩不可思議威神之力，已於過去無量劫中已作佛竟，號正法明如來。大悲願力，為欲發起一切菩薩，安樂成熟諸眾生故，現作菩薩。」按呢咱就會當了解，原來觀世音菩薩早就已經成佛囉，伊就是正法明如來，伊不過是示現菩薩身來度化眾生爾爾，這就莫怪世尊會佇《法華經．普門品》內底講：「善男子！若有國土眾生，應以佛身得度者，觀世音菩薩即現佛身而為說法。」究竟伊本底就是佛！

總講一句，咱共伊稱做佛祖是無啥問題的。雖講伊早就成佛囉，猶毋過為著欲救度眾生，伊嘛會當隨時改變家己的形象，就算是示現非人嘛無要緊，只要會當使眾生得救，伊就會化現適當的身形來觀世間音，循聲救苦度眾生，這就是伊慈悲的所在。